Du wéils gären al Kleeder oder Stoffer spenden?

Fir eis Kreatioune, benotze mir exklusiv Occasiounskleeder a -stoffer, déi eis vu Privatpersounen offréiert ginn. Mir verschaffe qualitativ héichwäerteg Stoffer vun all Zort. Aus eethesche Grënn benotze mir kee Pelz. Weider Informatiounen zu eiser Aarbecht an de verwente Matièrë fënns Du hei.

Wann s Du Second-Hand Kleeder oder Stoffer u BENU COUTURE wëlls spenden, da went Dech wgl. un eng vun de BENU Sammelplazen.

Ah jo, d'Kleederspenden...

Weess Du, wat mat Dengen ale Kleeder geschitt, déi s Du sozialen Organisatiounen, am Recyclingzenter oder an e Container ofgëss?

A Lëtzebuerg sammele karitativ Associatioune järlech 9.000 Tonne Kleeder. E ganz klenge Prozentsaz vun 1,7% gëtt tatsächlech u Leit am Besoin verdeelt. Déi reschtlech Kleeder ginn an d'Ausland verkaf, wou se nach eemol gesënnert ginn, an dann nees un e Second-Hand Shop (10%) oder op den internationale Maart (36%) weiderverkaf. De Rescht gëtt a Lompe transforméiert, verbrannt oder lant op der Deponie. De Maart ass schonn esou vu Kleeder iwwerschwemmt datt et sënnlos ass, weider Kleeder ze spenden.

Dowéinst invitéiere mir Dech, mat eis aner Léisungen ze sichen. Looss eis zesummen aktiv ginn a méi nohalteg handelen!

Vläicht gëtt et an Denger Gemeng oder an der Ëmgéigend schonn Initiativen, déi Second-Hand Kleedung weiderverwenden oder weiderverkafen...? Oder eng "Tauschbörse" fir Kleeder? Vläicht kann een Deng al Kleeder flécken oder opwäerten... D'Ofginn an d'Spende vu Kleeder komme fir eis eréischt als allerlescht Optiounen a Fro. Merci awer, datt s Du u BENU geduecht hues :)

Weider Gedanken dozou fënns Du am BENU COTURE sengem Mikro fir Politesches!

Du kanns Deng Kleederspend wärend den Ëffnungszäiten ouni Rendez-vous am BENU Shop zu Esch/Uelzecht ofginn. Fir déi aner Sammelplaze biede mir Dech, virdrun telefonesch e Rendez-vous festzeleeën.